ರಚನೆ: ಪುರಂದರದಾಸರು
ಬಂದಾಳು ನಮ್ಮ ಮನೆಗೆ |
ಶ್ರೀ ಮಹಾಲಕ್ಷ್ಮಿ ಸಂಜೆಯ ಹೊತ್ತಿನಲ್ಲಿ || ಪ ||
ಬಂದಾಳು ನಮ್ಮ ಮನೆಗೆ ನಿಂದಾಳು ಗೃಹದಲ್ಲಿ |
ನಂದ ಕಂದನ ರಾಣಿ ಇಂದಿರೇಶನ ಸಹಿತ || ಅ.ಪ ||
ಹೆಜ್ಜೆಯ ಮೇಲೆ ಹೆಜ್ಜೆ ನಿಕ್ಕುತ
ಗೆಜ್ಜೆಯ ಕಾಲ ಘಲ್ ಘಲ್ ಘಲುರೆನುತ |
ಮೂರ್ಜಗವ ಮೋಹಿಸುತ್ತ ಮುರಹರನ ರಾಣಿಯು
ಸಂಪತ್ತು ಕೊಡಲಿಕ್ಕೆ ವೆಂಕಟೇಶನ ಸಹಿತ || ೧ ||
ಪ್ರತಿ ದಿನ ಸಂಜೆಯಲ್ಲಿ
ಶ್ರೀ ಮಹಾಲಕ್ಷ್ಮಿ ನಗುತ ಕುಳಿತಿರಲು |
ಭೂಸುರರೆಲ್ಲಾ ಸೇರಿ ಸಾಸಿರ ನಾಮ ಪಾಡಿ
ವರವ ನೀಡುವಳು ತಾಯಿ ವಾಸುದೇವನ ಸಹಿತ || ೨ ||
ಕನಕವಾಯಿತು ಮಂದಿರ ಜನನಿ ಬರಲು
ಜಯ ಜಯ ಜಯವೆನ್ನಿರೋ |
ಸನಕಾದಿ ಮುನಿಗಳ ಸೇವೆಯನು ಸ್ವೀಕರಿಸಿ
ಕನಕವಲ್ಲಿಯು ತನ್ನ ಕಾಂತನ ಕೂಡಿಕೊಂಡು || ೩ ||
ಉಟ್ಟ ಪೀತಾಂಬರವು ಹೊಳೆಯುತ್ತಾ
ತೊಟ್ಟ ಕಂಕಣ ಕೈಪಿಡಿಯುತ್ತಾ |
ಸೃಷ್ಟಿಗೊಡೆಯಾ ನಮ್ಮ ಪುರಂದರವಿಠಲನ
ಪಟ್ಟದ ಅರಸಿ ನಮಗೆ ಇಷ್ಟಾರ್ಥ ಕೊಡಲಿಕೆಂದು || ೪ ||
Pingback: Bandaalu Namma Manege - Lyrics - ShriLahari.Com